Na apresentaçom da AEG

Intervençom de Carlos Garrido em representaçom da Comissom Lingüística
por ocasiom da constituiçom da Associaçom de Estudos Galegos
Santiago de Compostela, 16 de janeiro de 2016

Caros amigos e amigas,

Comparecemos hoje aqui porque desejamos participar na constituiçom, iminente, de umha associaçom cívico-cultural comprometida com umha codificaçom e com umha promoçom social do galego que, de modo irrenunciável, atendam ao seu parentesco essencialmente galego-português, mas que, ao mesmo tempo, nom desprezem as legítimas particularidades que conferem à língua da Galiza umha personalidade própria no seio da Galaicofonia ou Lusofonia.

Sabemos que algumhas entidades do campo lingüístico nunca enveredárom por esse caminho, o único que garante ao galego algumha possibilidade de regeneraçom cabal, e que outras, embora de vocaçom reintegracionista, tenhem derivado nos últimos tempos, infelizmente, para um cosmopolitismo descarnado que, em detrimento da socializaçom eficaz da língua e da construçom nacional da Galiza, desconsidera ou relega à irreleváncia o contributo galego à configuraçom da língua comum.

Por isso, vários membros da antiga Comissom Lingüística da AGAL tomamos a iniciativa de encetarmos, dentro da Associaçom de Estudos Galegos, umha nova etapa da Comissom Lingüística, que deverá caraterizar-se por um trabalho constante e rigoroso ao serviço de umha plena regeneraçom formal e funcional da língua autóctone da Galiza, simultaneamente nacional e internacional.

Para contribuirmos para essa efetiva regeneraçom do galego, as pessoas chamadas a integrar a Comissom Lingüística da Associaçom de Estudos Galegos propomo-nos trabalhar em duas áreas fundamentais, nomeadamente, o estabelecimento e regulaçom da norma galega do galego-português, por um lado, e a socializaçom de tal atividade codificadora, por outro. Por sua vez, cada umha destas áreas apresenta duas vertentes:

Dentro da primeira área de trabalho, a codificadora, a Comissom Lingüística da AEG deverá, por um lado, atualizar e aperfeiçoar os textos normativos já elaborados pola antiga Comissom Lingüística, respeitantes à codificaçom ortográfica, à morfológica e à lexical de alto nível; por outro lado, deverá dar contributos encaminhados a completar a codificaçom do galego, atendendo ámbitos constitutivos da língua ainda nom regulados, como, sobretodo, o prosódico e o morfossintático.

Já na segunda área de trabalho, a da socializaçom, a Comissom Lingüística da AEG deverá, por um lado, produzir ou colaborar na produçom de materiais didáticos e divulgadores concebidos para difundir entre a cidadania a sua atividade codificadora, como manuais práticos de língua e repositórios lexicográficos de diversos campos e temas, na linha do Dicionário Galego do Futebol que, na sua segunda ediçom, o núcleo inicial da Comissom Lingüística publicará em breve através do sítio internético da AEG; por último, a Comissom Lingüística da AEG também se coloca diretamente ao dispor dos cidadaos e coletivos da Galiza para atender quaisquer consultas e pedidos de colaboraçom que, em matéria de corpus e de status do galego, aqueles lhe quigerem endereçar, para o que, desde cedo, a CL-AEG habilitará um consultório lingüístico e outros canais de comunicaçom com toda a sociedade galega.

Estes som, portanto, os projetos que, com as limitaçons humanas e institucionais que se revelarem inevitáveis —mas, em todo o caso, contando com apoio sincero e espaço cordial—, a Comissom Lingüística se prontifica a ir desenvolvendo, desde já, no seio da Associaçom de Estudos Galegos. Trabalho nom falta, que aos trabalhadores nom falhe o ánimo! Muito obrigado!